«Мәңгілік Ел» идеясы

Қазақстанның қазіргі таңдағы басты стратегиялық мақсаты – экономикасы тұрақты дамыған, бәсекеге қабілетті әлемдегі ең озық 30 елдің қатарынан көріну. Осы асқақ арманға жетелейтін негізгі жоба – «Мәңгілік Қазақстан» бастамасы. «Мәңгілік Ел» ұлттық идеясы дегеніміз – өткен тарихымыздан ғибрат ала отырып, болашағымызды баянды ету жолындағы биік мұратымыз. Мемлекет басшысы өз Жолдауында еліміздің 2050 жылға дейінгі дамуының жаңа саяси бағытын айқындап берді. Бұл стратегияны мүлтіксіз орындау – әрбір саналы азамат үшін ортақ парыз бен абыройлы міндет болып табылады. Тарихи шындыққа сүйенсек, тәуелсіздікке қол жеткізгеннен гөрі, оны ұстап тұру әлдеқайда қиын. Дүниежүзілік тарихта ішкі алауыздық пен берекесіздіктің кесірінен ұлт ретінде жойылып кеткен елдер аз емес. Сондықтан біз өзгенің қателігінен сабақ алып, ұлттық бірлігімізді нығайтуымыз қажет. Мәңгілік Ел болу – өз қолымызда, ол үшін үнемі алға ұмтылып, тәуелсіздігімізді көздің қарашығындай сақтауымыз керек. Ел мен тіл – егіз ұғым. Мәңгілік елдің болашағы оның мәңгілік тілімен тығыз байланысты. Бабалардан мирас болып қалған асыл қазынамыз – қазақ тілі мемлекеттік тіл ретінде ұлттың ұйытқысына айналуы тиіс. Мемлекет тарапынан тілді дамытуға жыл сайын қомақты қаржы бөлініп, кешенді шаралар жүзеге асырылуда. Ана тілімізді даудың нысаны емес, берекенің бастауы ете білу – біздің басты міндетіміз. Тек алдына биік мақсат қойған, жастары білімді әрі рухты ел ғана ғасырлар бойы салтанат құра алады. «Мәңгілік Ел» идеясы бізді жаңа белестерге жетелейтін нық тұғыр болмақ. Елдігіміз бен туған тіліміз мәңгілік жасай берсін!