Сандық

Менің отбасым ескі жиһаздар жасайды. Мен де бұл кәсіпті жақсы көремін. Бірде мен әпкемнің ұзату тойына ерекше сыйлық жасағым келді. Ол үшін өз қолыммен сандық дайындадым. Мен сандықты қызыл түске бояп, бетіне әдемі қазақ оюларын салдым. Әпкем бұл сыйлықты қатты ұнатты. Сандық – қазақтың өте ескі жиһазы. Бұрын адамдар оның ішіне киімдер мен бағалы заттарды сақтаған. Қыз тұрмысқа шыққанда, ата-анасы оған сандық сыйлайды. Сандықтың ішіне қыздың киімдері мен әшекейлерін салады. Ал сандықтың үстіне көрпе-төсектерді жинап қояды. Қыз жаңа үйіне барғанда, адамдар «Сандық ашар» салтын жасайды. Олар сандықты ашып, ішіндегі матаны әйелдерге бөліп береді. Бұл – «сіздердің үйлеріңізде де осындай жақсы той болсын» деген тілек. Енді әпкемнің үйінде мен жасаған сандық тұр. Бұл мен үшін үлкен мақтаныш. Мен болашақта отбасылық кәсібімізді жалғастырамын.